Galicia conta co programa de transplante pulmonar máis activo de España
A conselleira de Sanidade clausurou as Xornadas de Transplante Pulmonar en Galicia coas que se conmemorou a celebración do 20 aniversario do primeiro transplante pulmonar realizado en España e os dez anos do inicio do programa de transplante pulmonar en Galicia.Pilar Farjas Abadía destacou que actualmente o Complexo Hospitalario Universitario A Coruña, de referencia en Galicia e un dos seis hospitais de referencia española en transplante pulmonar, conta co programa máis activo de España “con resultados equiparables aos mellores do mundo e con supervivencias do 90% o primeiro ano”. No complexo coruñés son transplantados en menos de 60 días, a metade do tempo de espera que a media nacional situada en 124 días.
Actualmente, en España grazas ao traballo dos equipos de profesionais en transplante de pulmón se beneficiaron 2.237 pacientes. En concreto, no Complexo Hospitalario Universitario A Coruña beneficiáronse 301 pacientes con este tipo de intervencións. Farjas Abadía destacou así mesmo que o incremento da actividade de transplantes permitiu só no ano 2009 realizar un total de 40 transplantes de pulmón, “o que o converte no segundo hospital español con máis intervencións e o primeiro por taxa de poboación, con 14,5 intervencións por millón de habitantes”.
Perfil dos doadores
As causas de morte dos doadores reflicten a constante diminución dos accidentes de tráfico e, na actualidade, o perfil tradicional do doante novo que faleceu nun sinistro de tráfico deu paso a un doante de entre 50 e 60 anos falecido por hemorraxia cerebral.
A conselleira de Sanidade explicou que estes cambios nos perfís dos doantes esixen un importante esforzo de adaptación aos complexos hospitalarios así, no hospital coruñés “dende o 2004 amosan un aumento paulatino ano a ano máis marcado no transplante unipulmonar, que ademais permite un mellor aproveitamento dos órganos con excelentes resultados”. A supervivencia dun 60% destes transplantados aos anos e dun 50% aos cinco anos, son unha boa mostra da mellora da calidade de vida destes enfermos.
Asistencia mellor e máis eficaz
Farjas Abadía sinalou tamén que o transplante de pulmón na actualidade é a última das alternativas terapéuticas a determinados procesos pulmonares como o enfisema, a fibrose quística, ou a hipertensión pulmonar primaria, entre outros diagnósticos presentes nos pacientes galegos.
Neste senso, a conselleira de Sanidade salientou que as enfermidades crónicas representan cada vez, una maior carga de morbilidade e da demanda de atención sanitaria. A prevención, potenciada dende a administración sanitaria, o diagnóstico precoz, ou a promoción dos autocoidados destes pacientes son fundamentais para determinar a resposta que debe proporcionar o sistema sanitario.
Nesta liña, Farjas Abadía sinalou que na Consellería de Sanidade e no Servizo Galego de Saúde “estamos convencidos de que na situación actual, e máis na nosa comunidade, cunha poboación claramente envellecida, debemos reprantexar a nosa forma de traballar”. Por iso, engadiu, “queremos impulsar a xestión por procesos e a xestión clínica, porque estes cambios requiren tempo e esforzo, pero creemos que só adaptando o sistema ás necesidades das persoas poderemos avanzar”.
Compromiso social
Farjas Abadía fixo un recoñecemento público aos doadores e ás súas familias que nun momento difícil teñen a valentía, a fortaleza e a xenerosidade de pensar nos demais. Tamén destacou e agradeceu o labor realizado polos profesionais que participan no proceso de doazón e transplante e contribúen a que o sistema galego se encontre situado dentro dos mellores de España.
Así salientou que “poucas actuacións dentro do campo sanitario requiren un compromiso tan concreto, da sociedade, dos profesionais e por suposto dos gobernos e das administración sanitarias” e engadiu que “estamos empeñados en que o xesto de doar teña un dos maiores recoñecementos sociais e sexa motivo de admiración social, polo que apoiamos e reforzamos o compromiso de igualdade e cohesión social que significa a doazón”.
Fonte: http://www.sanasana.es/?p=3996
Sem comentários:
Enviar um comentário